دڵشاد ئەنوەر
ئەمڕۆ هێزێکی زۆری هێنایە سەر بیرە نەوتی چاڵاو خالد لە سنوری ناحیەی کوڵەجۆی گەرمیان و دواتر هێزەکەی کشاندەوە.
حەشد هات و گەڕایەوە، گەر بەڕواڵەت لەم ڕووداوە بڕوانین ڕووداوێکی چەند کاتژمێری ئاساییە، بەڵام لە راستیدا لە ناوەڕۆکدا جوڵەیەکی گەورەی پەیام ئامێزە، بەتایبەت لەمکاتەدا کە گرفتێکی ئەوتۆ لە نێوان هەرێم و بەغدا بوونی نییە.
پێش ئەوەی بڕۆمە ناو بابەتەکەوەو هەڵبدەم بە لۆژیکی لێی بکۆڵمەوە، دەمەوێت ئاماژە بەوەبکەم بیرە نەوتی چاڵاوخالد بیرە نەوتێکی کۆنەو نەوتی لێ دەرناهێنرێ. حکومەتی هەرێمیش بەهیچ جۆرێک چاوی لەسەر ئەو بیرە نەوتییە نییە، چونکە شوێنی بیرەکە لەڕووی سەربازییەوە نزیکە لە هێزە عێراقییەکانەو داهاتووی بۆ هەرێم نییەو ئەم ڕووداوەش نەبووایە بیری وا لە خەیاڵی هەرێم دا هەر نەماوە.
پاشان نەوتەکەشی هێندە زۆر نییە کۆمپانیای زەبەلاحی بۆ ببرێت و ئێستاش هیچ کۆمپانیایەک لەناوچەی وەک ئەوێ کار بۆ هەرێم ناکات، هەرێم نەوتی خۆی بۆ ساغ ناکرێتەوە، چ جای ئەوەی بڕوات لەو ناوچە دوورە وەبەرهێنان لە بیرە نەوتێکی کۆن و لەکارکەوتوودا بکات.
حکومەتی عێراق بەفەرمی بیرە نەوتییەکانی دەوروبەری قەرەتەپە، واتە دەوروبەری ئەو ناوچەی کە ئەمڕۆ حەشد هێزی تێبردووە داوە بە کۆمپانیایەکی ئیماراتی، لێرەوە گومان دەست پێدەکات. دەکرێ بپرسین گومانی چی؟
ئەو هێزەی حەشد کە هاتووە بەرپرسێکی زۆر زۆر باڵایان لەگەڵ بووە، جوڵەکردنی هێزو بوونی بەرپرسی وا باڵا لەگەڵ هێزەکەدا بە جوڵەی گەورە دادەنرێت، بۆیە پێدەچێت جوڵەکە بۆ دوو مەبەست بێت؛
یەکەم: پەیام بێت بۆ خودی حکومەتی عێراق کە پێشتر بیرە نەوتیەکانی قەرەتەپەی بە کۆمپانیای ئیماراتی داوە، بە تایبەت ئەو هێزانە دوو ئاراستەی جیاوازن لەگەڵ ئیماراتدا، یاخود شەڕی داهاتووی نەوت بێت لەو ناوچەیە بۆ پشکداری و هەوڵ بێت بۆ دەست بەسەرداگرتنی نەوتی ناوچەکە.
دووەم: پەیامێکیش بێت بۆ هەرێم بەوەی بیرە نەوتییەکان تا کۆتایی لە ژێر کۆنترۆڵتاندا نابێت. بەتایبەت دەمێکە پارتی لە سنوری گوێر سەنگەری نزیک لە بیرە نەوتییەکان توندو تۆڵ دەکات.
ئینجا پێشتر عێراق ویستوویەتی لەو ناوچە بیری نوێ لێبدات، بەڵام هەرێم ناڕەزایەتی دەربڕیووە و لەم ڕوانگەشەوە مەسەلەکە گەر پەیامە.
پرسیارێکی تر دێتە پێشەوە، بە تایبەت حەشدی شەعبی خۆی ئامانجی هاتنی هێزەکەی بە جۆرێکی تر خستەڕوو، سایت و پەیجەکانی پارتی و یەکێتی و بەرەی گەلیش هەریەکەو بە جۆرێک، هەوڵدەدەم یەک بە یەک بێمە سەری و خوێندنەوەی لۆژیکی بۆ بکەم.
یەکەم: حەشدی شەعبی هۆکاری هاتنی هێزەکەی بۆ ئۆپەراسیۆنی دژ بە داعش گێڕاوەتەوە، لە ڕاستیدا ئەمە تەنها پاساوەو ڕاست نییە، چونکە لەو ناوچەیە هێندە چەکداری داعش بوونی نییە، تا ئەو هێزە گەورەی بۆ ببرێت. پاشان هێزەکە هەوڵیدا ساتر و خاڵی سەربازی دروست بکات، کەواتە ئامانجی مانەوەیان هەبوو نەک ئۆپەراسیۆنێکی کاتی.
دووەم: میدیای نزیک لە بەرەی گەل ئۆپەراسیۆنەکەی حەشدی بە تاکتیک وەسفکرد، تا بیرە نەوتییەکان ڕادەستی هێزی کۆماندۆی یەکێتی بکرێت، لە ڕاستیدا ئەمەش دوورە لە ڕاستییەوە، بۆ؟
چونکە ئەو هێزەی نەوت و گاز کە ئەو بیرانە دەپارێزن بەیەک تەلەفۆنی سەرۆکی یەکێتی دەکشێنەوەو جێبەجێکردنی تاکتیکی وا ئەم هەڵایەی ناوێ.
پاشان بیرە نەوتییەکانی چاڵاو خالد کۆن و لەکار کەوتوون، نەوتیان لێ دەرناهێنرێ تا هێزێک تەماعی بکات. ئینجا ئەو بیرانە لە داهاتوودا حکومەتی عێراق گەر وەبەرهێنانیان تێدا بکات، چۆن رێگە بە هێزی یەکێتی دەدات لێی بمێنێتەوە، خۆ عێراق دەوڵەتەو هێزی حزب ناتوانێت ڕێی لێ بگرێ.
سێیەم: میدیاکانی نزیک لە پارتی هۆکاری هاتنی هێزەکەی حەشدیان بۆ تەنسیق لەگەڵ سەرۆکی یەکێتی گێڕایەوە، لە ڕاستیدا بەرپرسێکی حەشدیش ئەم قسەیەی کردبوو، بەڵام بوونی تەنسیق لەمکاتەدا لۆژیکی نییە، چونکە:
یەکەم: هێزەکەی حەشد زۆر کوت و پڕ هاتوون و هێزەکەشیان هێزێکی گەورەی پڕ چەک و تەقەمەنی بووە، ئەمە ئاماژەیە بۆ ئەوەی ئیحتیاتی ئەوەیان کردووە ڕووبەڕووی شەڕ ببنەوە، بەڵام بوونی تەنسیق ئەم هەموو هێزەی نەدەویست، تەنها ناردنی دە هەمەری سەربازی بەسبوو.
دووەم: ئاگادارم لە کاتژمێر پێنجی بەرە بەیانەوە جۆرێک لە شپرزەیی ناو یەکێتیدا هەبوو، چونکە ڕووداوەکە کوت و پڕ بوو.
سێیەم: یەکێتی گەر تەنسیق بۆ شتی وا بکات لەمکاتەدا نایکات، چونکە هەڵبژاردنی لە پێشەو زەربەی وا گەورە لە خۆی نادات.
چوارەم: ئەو بەرپرسەی حەشد کە دەڵێت” بە تەنسیق لەگەڵ سەرۆکی یەکێتی هاتووین” ئەمە قسەیەکی ژیرانەو بۆ جێبەجێکردنی پلانەکەیان بووە دوور لە شڵەژان. ئەگینا ئێستا بافڵ تاڵەبانی لە ئەمەریکایە بۆ بەشداری لە کۆنگرەی دیموکراتەکان، ئەم تەنسیقە کوت و پڕە چۆن دروستبوو؟
وەک بیستوومە، پێشتر یەکێتی ئاگادار کراوەتەوە لە بۆشاییە ئەمنییەکانی ئەو سنورە لەلایەن حەشدەوە هەندێک جموجۆڵ دژی داعش دەکرێ، ڕەنگە حەشد هەوڵیدابێت بەم پاساوەوە لەو ناوچەیە جێگیر ببێت، هەر بۆیە پەیامەکەی یەکێتیش توندبوو، گەر لێیبڕوانین ئەوەی تێدایە کە حەشد فێڵی لێکردوون و بەناوی ئۆپەراسیۆنەوە شتی تر لە ژێر سەریاندا بووە… حەشدیش کە کشایەوە هۆکارەی بۆ ئۆپەراسیۆنێکی کاتی دژی داعش گێڕایەوە.
بە کورتی حەشد بۆ داهاتووی نەوتی ناوچەکە هات…