دەنگ نێت
وتەبێژی وەزارەتی ناوخۆی عێراق دەڵێت: لەو کارگەیەی کە هەفتەی رابردو لە نزیک دەربەندیخان دەستی بەسەردا گیرا، دەستیانگرتوە بەسەر 150 کیلۆگرام مادەی هۆشبەردا.
لە چەند شەوی ڕابردوودا، هێزێکی هاوبەشی ئاسایشی نیشتمانی عێراق و دەزگا ئەمنییەکانی سلێمانی لە گوندی ئاوباری نزیک قەزای دەربەندیخان دەستیان بەسەر کارگەیەکی مادەی هۆشبەردا گرت.
عەمید میقداد میری، بە دەنگی ئەمریکای راگەیاندوە: لە سەربنەمای ئەو زانیاریانەی کە لە سوریاوە پێماندراوە، کارگەکەمان لەناوبردوە و چوار کەسیشمان دەستگیرکردووە.
کارگەکە لە نێو کێڵگەیەکی پەلەوەردا بووە و بەپێی وتەی بەرپرسانی عێراق، کارگەی بەرهەمێنانی کریستاڵ بوە، کە بەنهێنی کریستاڵ لەو کارگەیە بەرهەمهێنراوە و رەوانەی وڵاتان و ناوچەکانی عێراق کراوە.
سەرچاوەیەکی حکومی بەرپرس و ئاگادار کە نەیویست ناوی بڵاوبکرێتەوە، بە دەنگی ئەمریکای راگەیاندوە: خاوەن کێڵگەکە کە کارگەکەی تێدابوە لەگەڵ سێ کەسی نزیکی دەستگیرکراون، خاوەن کێڵگەکە لیوایەکی پێشمەرگەی خانەنیشینە.
وتیشی: کارگەکە سەرەتا لەلایەن چەند کەسێکی سورییەوە بە ناوی کارگەی شامپۆوە دانراوە، یەکێک لەو کەسە سورییانە بە ناوی ئەبو رێکان لە وڵاتەکەی خۆی دەستگیرکراوە و زانیاری لەبارەی کارگەکەوە داوەتە دەزگای هەواڵگیری سوریا، ئەوانیش عێراقییان ئاگادارکردوەتەوە و دواجار هێز نێردراوەتە سەر کارگەکە.
بەپێی وتەی سەرچاوەکە، کەلوپەلی کارگەکە بۆ بەغدا گواستراوەتەوە و چوار دەستگیرکراوەکەش لەلایەن دەزگا ئەمنییەکانی سلێمانییەوە لێکۆڵینەوەیان لەگەڵ دەکرێت.