دادوه‌رێكى گه‌رمیان له‌سه‌ر روداوه‌كه‌ى ئه‌مڕۆی دادگاى سلێمانى هاته‌ده‌نگ

2022/06/13 - 08:53 | 1054 جار بینراوە    
 
ده‌نگ نێت
 
دادوه‌رێكى گه‌رمیان ئیدانه‌ى ره‌فتارى ئه‌و پله‌داره‌ ده‌كات كه‌ له‌ دادگاى سلێمانى ئه‌مڕۆ شه‌قی له‌ ژنێك هه‌ڵدا و ده‌ڵێت: پێویسته‌ رێکاری یاسایی له‌به‌رامبه‌ردا بگیرێتەبەر.
 
دادوه‌ر: بورهان ئه‌حمه‌د، ئه‌ندامى داواكارى گشتى، له‌ پۆستێكدا له‌ هه‌ژمارى خۆی له‌ فه‌یسبوك له‌باره‌ى روداوه‌كه‌ى ئه‌مڕۆی دادگاى سلێمانى و شه‌قهه‌ڵدانى پله‌دارێك له‌ ژنێك، ده‌ڵێت: "دادوەر یان پۆلیس و ئاسایش ئەبێ خاوەن سنگێکی فراوان بن تەفەهومی باری دەروونی کەسوکاری کوژراو بکەن و لە هەرپەرچەکردارێکیان ببوورن، نەک شەقیان تێ هەڵدرێ وەکوو ئەمڕۆ ڕووی دا".
 
ده‌شڵێت: بەڕاستی ئەمە لەهەر کەس بوەشێتەوە نابێ لە پۆلیس و ئاسایش بوەشێتەوە.
 
ئه‌و دادوه‌ره‌ جه‌ختیش ده‌كاته‌وه‌ له‌وه‌ى "پێویستە ڕێکاری یاسایی بگیرێتەبەر و ئەو جۆرە کەسانە سزای خۆیان وەرگرن، جگە لەوەش نابێ حکوومەت بهێڵێ  ئەو جۆرە کەسانە لەو سیلکەبن، چونکە ناوبانگی هەمووان لەکەدار ئەکەن".
 
ئه‌مڕۆ له‌كاتى به‌ڕێوه‌چونى دادگاییكردنى تۆمه‌تبارێكى دۆسیه‌ى كوشتنى "تارقی به‌قاڵ" له‌ دادگاى سلێمانى، ئاڵۆزی دروست بو دواى ناڕه‌زایه‌تى ده‌ربڕینی خێزانى قوربانیه‌كه‌ له‌ هه‌نگاوێكى دادگا، به‌وهۆیه‌وه‌ دادوه‌ر ژماره‌یه‌ك ئه‌ندامى خێزانى قوربانیه‌كه‌ى راگرت، له‌ ده‌ره‌وه‌ى هۆڵی دادگاییه‌كه‌ش ئاڵۆزیه‌كه‌ سه‌ریكێشا بۆ ئه‌وه‌ى پله‌دارێك به‌ شه‌ق له‌ خوشكێكى قوربانیه‌كه‌ بدات.
 
تارقی به‌قاڵ، كاسبكارێكى سلێمانى بو، له‌ ساڵی 2018، دواى رفاندنى له‌لایه‌ن چه‌ند كه‌سێكه‌وه‌ دواتر كوژرا.
 
 



Dengnet.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 847,896     ژمارەی میوان 36