دواى دۆڕانى به‌رشه‌لۆنه‌، كومان گه‌شبینه‌ و نایگلسمانیش ناڕازیه‌

2021/09/15 - 09:13 | 122 جار بینراوە    
 
ده‌نگ نێت
 
دواى دۆڕانى یانه‌ى به‌رشه‌لۆنه‌ له‌ یاری یه‌كه‌مى گه‌ڕى كۆمه‌ڵه‌كانى وه‌رزی 2021-2021ى خولی یانه‌ پاڵه‌وانه‌كانى ئه‌وروپا، رۆناڵد كومانى راهێنه‌ر گه‌شبینه‌ و ده‌ڵێت جیاوازیه‌كى زۆر هه‌بو له‌ كوالێتى هه‌ردو تیپ دا.
 
شه‌وى رابردو به‌رشه‌لۆنه‌ له‌ خاكی خۆی به‌ 3 گۆڵی بێ وه‌ڵام به‌ یانه‌ى بایرن میونخ دۆڕا. له‌ كۆنگره‌ى رۆژنامه‌وانى پاش یارییه‌كه‌ش، راهێنه‌رى بلوگرانا: رۆناڵد كومان، ئاماژه‌ى به‌وه‌كرد كه‌ تیپه‌كه‌ى كاتى ده‌وێت بۆ ئه‌وه‌ى به‌ته‌واوى ئاماده‌بێت، به‌تایبه‌تى كه‌ ژماره‌یه‌ك یاریزانى سه‌ره‌كیی پێكانیان هه‌یه‌ و یاریی ناكه‌ن.
 
وتیشی: "جیاوازیی له‌ كوالێتی هه‌ردو تیپ دا هه‌یه‌، بایرن ماوه‌یه‌كى زۆره‌ هه‌مان ئه‌و یاریزانانه‌ى هه‌یه‌"، له‌ ئاماژه‌یه‌كدا بۆ ئه‌وه‌ى زۆرێك له‌ یاریزانه‌كانى تیپه‌كه‌ى تازه‌ و لاون و هه‌یانه‌ یه‌كه‌مجاره‌ یاری ده‌كه‌ن له‌ نمونه‌ى لۆك دی یۆنگ.
 
ئاماژه‌ى به‌وه‌شكرد: له‌ سێ بۆ چوار هه‌فته‌ى داهاتودا دۆخی تیپه‌كه‌ى باشتر ده‌بێت كاتێك یاریزانه‌ پێكراوه‌كانیان ده‌گه‌ڕێنه‌وه‌.
 
لایخۆشیه‌وه‌ نایگلسمان-ى راهێنه‌رى یانه‌ باڤارییه‌كه‌، ئاماژه‌ى به‌وه‌كرد: تیپه‌كه‌ى ده‌یتوانى به‌ ده‌ره‌نجامێكى گه‌وره‌تره‌وه‌ له‌ یاریه‌كه‌ بێته‌ ده‌ره‌وه‌.
 
وتیشی: ده‌كرا له‌ هه‌ندێك لایه‌نى یاریگا به‌شێوه‌یه‌كى باشتر ده‌ركه‌وتینایه‌.
 
 



Dengnet.net - 2021
دروستکراوە لەلایەن کۆمپانیای (کۆدتێك)ەوە
ژمارەی سەردان 390,101     ژمارەی میوان 10