دەنگ نێت
رێژەی بارانبارین لە هەمو بەشێکی گەرمیان ١٠٠ ملیمەتری تێپەڕاندوە، شارەزایەکی کەشناسیش دڵنیایی دەدات کە مەترسی وشکەساڵی لەسەر ناوچەکە نەماوە، کشتوکاڵی گەرمیانیش دەڵێت: هێشتا پێویستمان بەبارانبارینی زیاترە.
بەپێی ئامارەکانی هۆبەی کەشناسی لە بەڕێوبەرایەتی گشتی کشتوکاڵی گەرمیان، ئەمساڵ تاوەکو ئێستا بارانبارین سەروی ١٠٠ ملیمەترە، بەشێوەیەک لە کەلار ١١٣ ملم باران باریوە و لە کفری ١٢٤ ملم و لە خانەقی ١١٦ ملم.
لە کاتێکدا وەرزی پێشو تا ئەم کاتە، رێژەکە کەمتر لە چارەکێکی بارانبارینی ئەم وەرزە بوە، هەروەک ٢ وەرزی رابردو لەسنوری گەرمیان وشکەساڵی بو، بەڵام شارەزایەکی کەشناسی رەتیدەکاتەوە ئەو مەترسیە بۆ ئەم
وەرزە مابێت.
سیروان ساڵح، کە سەرپەرشتیاری پەیجی کەشوهەوای گەرمیانە، بە رادیۆی دەنگی وت: بەو رێژە بارانبارینەی هەیە، هیچ مەترسیەکی وشکەساڵی لەسەر گەرمیان نەماوە.
لەبەرامبەریشدا بەرێوبەری گشتی کشتوکاڵی گەرمیان، شادیە حسێن، بۆ رادیۆی دەنگ وتی: دو جۆر وشکەساڵی هەیە: وشکەساڵی لە روی سامانی ئاو و کشتوکاڵ، لە روی سامانی ئاوەوە رەنگە گرفتێک نەبێت، بەڵام بۆ رزگاربون لە مەترسی وشکەساڵی کشتوکاڵیی، بابەتەکە جیاوازە و دەبێت تاوەکو مانگی نیسان باران بارین بەردەوام بێت و تێکڕا رێژەکە بگاتە ٢٥٠ ملم.