دەنگ نێت
لەماوەی یازدە مانگدا لە رێگای کەلار- دەربەندیخان و دەربەندیخان زەڕایەن زیاتر لە ١٠٠ روادوی هاتوچۆ رویانداوە، بەڕێوبەری هاتوچۆی دەربەندیخانیش دەڵێت: نۆژەنکردنەوەی تونێلی دەربەندیخان کاریگەری نابێت لەسەر کەمکردنەوەی روداوەکانی هاتوچۆ.
ماوەی زیاتر لە مانگێکە پرۆژەی نۆژەنکردنەوەی تونێلی دەربەندیخان دەستیپێکردوە وەک هەوڵێک بۆ چاککردنەوەی رێگای کەلار- سلێمانی.
جاسم محەمەد، بەڕێوبەری هاتوچۆی دەربەندیخان، بە رادیۆی دەنگی وت: ئەو کارانەی لە نۆژەنکردنەوەی تونێلی دەربەندیخاندا کراون، پێویستبو، بەڵام زیاتر کاری تەکنیکی بون، لەوانە دانانی ئینارە.
جەختی لەوەشکردوە تونێلەکە سودی کاریگەری نابێت بۆ کەمکردنەوەی روداوەکانی هاتوچۆ و گرفتی سەرەکی لە رێگاکانە.
بەپێی ئامارێک کە دەست رادیۆی دەنگ کەوتوە، لە ماوەی یازدە مانگی ئەمساڵدا لە رێگای کەلار- سلێمانی، ١٠٢ روداوی هاتوچۆ رویانداوە، بەوهۆیەشەوە ٢٧ کەس گیانیان لەدەست داوە.