دەنگ نێت
کارمەندێکی ھاتوچۆ لە کەلار دەڵێت: به‌هۆى ئه‌وه‌ى خاوەنی ئۆتۆمبێلێكى سەرپێچیکاری داوه‌ته دادگا و بۆ ماوه‌ى ١٠ رۆژ ده‌ستگیرکراوە، سکاڵای لێکراوە و ئەمڕۆ راگیراوە و پاشان بە کەفالەت ئازاد کراوە.
عه‌لى جاف، براى كارمه‌نده‌كه‌ى هاتوچۆى كه‌لار، به رادیۆى ده‌نگى وت: کوڕی بەرپرسێک لە کەلار، سەرپێچیی لە یاسای ھاتوچۆ کردوە، براکەشم لێپرسینەوەی لەگەڵ کردوە و داویەتی بە دادگا.
رونیشیکردەوە: بەھۆی ئەو سەرپێچییەوە، کوڕی بەرپرسەکە بە فەرمانی دادوەر راگیراوە.
ئاماژەی بەوەشکرد پاش ئەوەی کوڕەکە دەستگیرکراوە، ئەوانیش ھەستاون بە تۆمارکردنی سکاڵا لەسەر براکەی، بەوھۆیەشەوە ئەمڕۆ براکەی چوەتە بەردەم دادوەر و راگیراوە، پاشان بە کەفالەت ئازاد کراوە.
رادیۆى ده‌نگ بۆ وه‌رگرتنى زانیارى زیاتر په‌یوه‌ندى به لایه‌نى به‌رامبه‌ره‌وه كرد، به‌ڵام ره‌تیان كرده‌وه لێدوان بده‌ن.
بەپێی زانیارییەکان، ئەو کوڕەی سەرپێچیی کردوە، کوڕی عەقید رێبوار عەباسی بەڕێوبەری گرتن و گواستنەوەی گەرمیانە، پاش ئەوەی سەرپێچی ھاتوچۆ دەکات لە فولکەیەکی گەڕەکی شەھیدان، ناوەستێت و دەگەڕێتەوە ماڵەوە، کارمەندەکەی ھاتوچۆش مەفرەزەی پۆلیس بانگ دەکات و دەچنە سەر ماڵی کوڕەکە بۆ دەستگیرکردنی، پاشان بە فەرمانی دادوەر کوڕەکە ١٠ رۆژ راگیراوە و ئۆتۆمبیلەکەشی بۆ ماوەی ٢٥ رۆژ دەستی بەسەردا گیراوە.
ھاوکات کوڕی بەرپرسەکە سکاڵای لەسەر کارمەندەکەی ھاتوچۆ تۆمارکردوە لەسەر ئەوەی بەبێ وەرگرتنی مۆڵەت لە دادوەر بە ھێزی ئەمنی ھاتونەتە سەر ماڵیان و فەرمانی دادگایان پێنەبوە بۆ ئەو کارە، بەوھۆیەشەوە دادگا ئەمڕۆ بانگھێشتی کارمەندەکەی ھاتوچۆی کردوە و راگیراوە، پاشان بە کەفالەت ئازاد کراوە.