دەنگ نێت
بەوتەی لێپرسراوی کاروباری مرۆیی لە ئیدارەی گەرمیان ٣٥٪ـی ئەو ئاوارانەی لە کەمپەکانی سنورەکەدا بون، نەگەڕاونەتەوە ناوچەکانی خۆیان و لە گەرمیان نیشتەجێ بون.
دوای سەرهەڵدانی داعش و لێکەوتەکانی، لە گەرمیان ٢ کەمپ بۆ ئاوارەکان دروستکران (کەمپی قۆرەتو و تازەدێ) کە ئێستا هەردوکیان داخراون. نیشتەجێبوی کەمپەکانیش ئاوارەی ناوچەکانی دیالە، سەڵاحەدین و بابل و دەوروبەری بون.
بێستون ژاڵەیی، لێپرسراوی کاروباری مرۆیی لە ئیدارەی گەرمیان، بە رادیۆی دەنگی وت: کەمپەکانی سنورەکە بە تەواوی چۆڵکراون، کە دواینیان ئەوەی تازەدێیە کە نزیکەی ٧٠٠ خێزانی تێدابو و سێ مانگە بەتەواوی چۆڵکراوە و لەئێستادا هیچ خێزانێکی ئاوارەی تێدا نەماوە.
وتیشی: بەڵام ٣٥٪ـی خێزانە ئاوارەکان دوای داخستنی کەمپەکان، نەگەڕاونەتەوە ناوچەکانی خۆیان و لەسنوری گەرمیان نیشتەجێبون، ئەویش بەهۆی بونی ئاستەنگ یان نەمانی خانو و جێگاوڕێگایان لە ناوچەکانی خۆیان.