دەنگ نێت
له سه‌رۆكایه‌تى شاره‌وانى ناحیه‌ى رزگارى به‌شى یاسایی نیه، ئه‌مه‌ش گرفتى بۆ هاوڵاتیان دروست كردوه لە راییكردنى مامه‌ڵه‌كانیان، سه‌رۆكى شاره‌وانى ناحیه‌كه‌ش ده‌ڵێت: هۆكاره‌كه‌ى نه‌بونى فه‌رمانبه‌رى یاساییه.
ئه‌رسه‌لان ئه‌حمه‌د، سه‌رۆكى شاره‌وانى ناحیه‌ى رزگارى بۆ رادیۆى ده‌نگ وتى: شاره‌وانییەکەمان پله دوه و له هه‌یكه‌لیه‌دا به‌شى یاسایمان هه‌یه، به‌ڵام به‌هۆى نه‌بونى فه‌رمانبه‌رى یاساییه‌وه به‌شه‌كه په‌ك خراوه، ئه‌مه‌ش گرفتى بۆ ئێمه‌ش و هاوڵاتیانیش دروست كردوه.
وتیشى: چه‌ندینجار داوامان كردوه له بەڕێوبەرایەتی گشتی شاره‌وانیه‌كانى گه‌رمیان كه فه‌رمانبه‌رێكى یاساییمان بۆ دابین بكه‌ن، به‌ڵام تاوه‌كو ئێستا ئه‌وه نه‌كراوه به‌بیانوى كه‌مى یاخود نه‌بونى فه‌رمانبه‌رەوە.
هێماى بۆ ئه‌وه‌شكرد: بۆ هه‌ر كێشه‌یه‌ك، ده‌بێت نوسراو بۆ شاره‌وانیه‌كانى گه‌رمیان بكه‌ین تاوه‌کو فه‌رمانبه‌رێكمان بۆ ده‌نیرێت، ئه‌مه‌ش بوه‌ته هۆى دواكه‌وتنى راییكرنى مامه‌ڵه‌كان، به‌تایبه‌ت به‌شى موڵكایه‌تى.
ده‌شڵێت: كاره‌كانى ئێمه دو به‌شن؛ ئه‌و ئیشانه‌ى تایبه‌تن به رێگه‌پێدان ئه‌وه له‌لایه‌ن نوێنه‌رى ئیداره‌ى گه‌رمیانه‌وه ده‌كرێت کە هەفتەی 2 رۆژ دێت و كاره‌كان ته‌واو ده‌كات، به‌ڵام ئه‌وه‌ى په‌یوه‌ندیدار بێت به هاوڵاتیان و ئه‌و سكاڵانه‌ى كه له‌سه‌ر شاره‌وانى ده‌كرێت یاخود ئه‌و سكاڵانه‌ى شاره‌وانى ده‌یكات بۆ وه‌رگرتنه‌وه‌ى مافه‌كانى، هه‌موى دوا ئه‌كه‌وێت به‌هۆى نه‌بونى ئه‌و به‌شه.