کەریم عەلی: وەزارەتی دارایی سکاڵای لێکردوم و لە دادگا دەیسەلمێنم لەسەر هەقم

2023/08/27 - 08:17 | 238 جار بینراوە    

 

دەنگ نێت

 

کەریم عەلی- ئەندامی ئەنجومەنی پارێزگای سلێمانی ئاشکرای دەکات، وەزارەتی دارایی سکاڵای لەسەر تۆمارکردوە، دەشڵێت: دەچمە بەردەم دادگا و دەیسەلمێنم کە لەسەر هەقم.

 

رۆژی ۱٦ـی ئەم مانگە کەریم عەلی، ئەندامی ئەنجومەنی پارێزگای سلێمانی بەشداری لە بەرنامەیەکی کەناڵی روداو کرد و تێیدا کۆمەڵێک قسەی کرد لەسەر وەزارەتی دارایی و بەتایبەت دەروازەکان، رۆژێک دواتر وەزارەتی دارایی کۆنگرەیەکی رۆژنامەوانی لەوبارەیەوە ئەنجام داو و وەڵامی ئەو ئەندامەی ئەنجومەنیان دایەوە.

 

کەریم عەلی، بەرادیۆی دەنگی راگەیاند: لەلایەن بەشی یاسایی وەزارەتی دارایی حکومەتی هەرێم سکاڵام لەسەر تۆمار کراوە بەهۆی ئەوەی لە کەناڵی روداو کۆمەڵێک راستی و حەقیقەتمان لەسەر دۆخی دەروازەکان خستوەتەڕو.

 

وتیشی: سکاڵایەکیان تۆمار کردوە و ئامادەییمان تێدایە بۆ بەردەم دادگا، هەمو بەڵگەو دۆکۆمێنتەکان دەخەینەڕو و بۆ دادگای دەسەلمێنین ئەم قسانە لەخۆمانەوە نەمانکردوە.