دەنگ نێت
بەڕێوبەری گشتی وەبەرهێنانی گەرمیان دەڵێت پرسی هەژمارکردنی دۆلار بە نرخی بانکی ناوەندیی لە قیستی پرۆژەکانی نیشتەجێبون، وەکو پێشترە و هیچ گۆڕانکاریەک روینەداوە.
هونەر مەحمود، بە رادیۆی دەنگی وت: ئەو بڕیارە کە نرخی دۆلار بۆ یەکە نیشتەجێبوەکان بە نرخی بانکی ناوەندیی هەژمار بکرێت، تەنها ئەو پرۆژانە دەگرێتەوە کە رەزامەندی حکومەتی عێراقیان هەیە، بەمەش هەرێمی کوردستان ناگرێتەوە.
وتیشی: لەئێستادا بەهەمان نرخی دۆلار کە لە بازاڕەکاندا هەیە و مامەڵەی پێوەدەکرێت، قیست و قەرزی یەکەکانی نیشتەجێبون وەردەگیرێتەوە.
پێشتر لەگەڵ بەرزبونەوەی نرخی دۆلار، حکومەتی عێراقی بڕیاریدا ئەو یەکە نیشتەجێبوانەی قیستەکانیان بە دۆلارە، هاوڵاتیان دەتوانن بەهەمان نرخی بانکی ناوەندی، پارەکانیان بدەنەوە، واتا ئێستا کە نرخی دۆلار بەپێی بانکی ناوەندیی ١٣٢ هەزارە بۆ ١٠٠ دۆلار، هەر بەوشێوەیە هەژمار بکرێت، لەکاتێکدا ئەگەر هاوڵاتی لەبازاڕدا دۆلار بکرێت، نرخەکەی بۆ ئەمڕۆ ١٤٧ هەزارە.