هاتوچۆی گەرمیان: ئەو خانوانەمان ناوێت کە بۆ کارمەندانی وەزارەتی ناوخۆ دانراوە

2023/05/12 - 01:10 | 1592 جار بینراوە    
 
دەنگ نێت
 
وتەبێژی هاتوچۆی گەرمیان دەڵێت: لەبەر سێ هۆکار نوسراومان کردوە بۆ ئیدارەی گەرمیان کە ئەو خانوانەمان ناوێت بڕیارە بۆ کارمەندانی وەزارەتی ناوخۆ دروست بکرێن، ئیدارەی گەرمیانیش جەخت لە بابەتەکە دەکاتەوە.
 
موقەدەم: سامان عەلی، وتەبێژی هاتوچۆی گەرمیان بە رادیۆی دەنگی راگەیاند: لەسەرەتاوە ۲۰۰ خانومان بۆ دانرابو، دواتر کەمکرایەوە بۆ ۱۷٥ خانو، دواتر کەمکرایەوە بۆ ۱٥۰ خانو، ئەمەش لەکاتێکدایە ۳٥۰ کارمەندمان داوای کردوە خانو وەربگرێت.
 
وتیشی: یەکێکی تر لە هۆکارەکان ئەوەیە هەرجارەو لەگەڵ کەمکردنەوەی ژمارەی خانوەکان پێشەکیەکەی زیاد ئەکرا بەجۆرێک بۆ خانویەکی ۱٦۰ مەتری جاری یەکەم ٥ هەزار دۆلار بو، بەڵام دواتر زیاد کرا بۆ ٦ هەزار دۆلار.
 
وتەبێژی هاتوچۆی گەرمیان هۆکاری سێیەمی گەڕاندەوە بۆ شێوازی دابەشکردنی خانوەکان و وتی: بەشی پێشەوەی کە روەو شەقامەکەیە داویانە بە کارمەندانی پۆلیس، بەڵام بەشی پشتەوەیان بە کارمەندانی هاتوچۆ داوە و شێوازی دابەشکردنی یەکەکانیش بە هەڵبژاردن نەبوە.
 
باسی لەوەشکرد کە لەساڵی ۲۰۰٥ـوە کارمەندەکانیان سودمەند نەبون لە وەرگرتنی زەوی و یەکەی نیشتەجێبون، وتی: چاوەڕێ دەکەین پرۆژەیەکی تر دەرچێت، ئەوکات داوا دەکەین بەشێکمان بۆ دانرێت.
 
لەبەرامبەردا بەڕێوبەری کاروباری ناوخۆ لە ئیدارەی گەرمیان جەخت لە بابەتەکە دەکاتەوە و دەڵێت: قیست و پێشەکی پرۆژەکە زۆرە.
 
دەربارەی ئەوەی کەواتا بۆچی نرخەکان کەم ناکرێنەوە، عەمید: حسێن شێرزاد، بۆ رادیۆی دەنگ وتیشی: ناتوانین فشار بخەینە سەر کۆمپانیاکە بۆ کەمکردنەوەی پێشەکی و قیسەتەکان، چونکە رێنمایی وەبەرهێنانە.
 
پرۆژه‌ى یەکەی نیشتەجێبونی كارمه‌ندانى وه‌زاره‌تى ناوخۆ خۆى له‌ ۱۲٥۰ یه‌كه‌ ده‌بینێته‌وه‌، بە وتەی بەڕێوبەری وەبەرهێنانی گەرمیان هەمو رێكاره‌كانى وه‌رگرتنى مۆڵه‌تى بۆ ته‌واو كراوه‌ و ئاراسته‌ى ده‌سته‌ى وه‌به‌رهێنانیان كردوه‌ بۆ ئه‌وه‌ى بڕیارى ئه‌نجومه‌نى وه‌زیرانى بۆ وه‌ربگیرێت.



Dengnet.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 1,664,567     ژمارەی میوان 712