شاره‌وانى كه‌لار له‌باره‌ى چۆڵكردنى "لیوا ره‌شه‌كه‌" له‌ماوه‌ى مانگێك دا رونكردنه‌وه‌ ده‌دات

2023/04/27 - 11:42 | 263 جار بینراوە    
 
ده‌نگ نێت
 
پسوله‌یه‌ك راده‌ستى دانیشتوانى لیوا ره‌شه‌كه‌"ـى كه‌لار ده‌كرێت كه‌تیایدا ده‌ڵێت ده‌بێت له‌ماوه‌ى مانگێك دا خانوه‌كانیان چۆڵ بكه‌ن ئه‌گه‌رچی هێشتا زه‌ویه‌كانیشیان پێنه‌دراوه‌، سەرۆکی شارەوانی کەلاریش رەتیدەکاتەوە دەست بە روخاندنی خانوەکانیان بكه‌ن.
 
بەپێی زانیاریەکانی رادیۆی دەنگ، دوێنێ پسوله‌یه‌ك دراوه‌ به‌ دانیشتوانی گەڕەکی "لیوا رەشەکە" و "جەمەلۆنەکە" لە قەزای کەلار و یه‌كى بڕی ١٥ هەزار دیناریان لێوەرگیراوە، له‌ پسوله‌كه‌دا هاتوه‌ كه‌ ده‌بێت لە ماوەی مانگێکدا خانوەکانیان بڕوخێنن.
 
دلێر هیدایەت، نوێنەری دانیشتوانی "لیوا رەشەکە" بە رادیۆی دەنگی وت: ئەو بڕە پارەیه‌یان لێوەرگرتین، بەڵام دڵنیانین لەوەی کەی زەویەکانمان پێدەدرێت، چونکە گرفتی هەیە و تاوەکو ئێستا چارەسەر نەکراوە.
 
دانیشتوانى ئه‌و دو شوێنه‌ كه‌ له‌ دواى راپه‌ڕینه‌وه‌ به‌ زیاده‌ڕۆ "تجاوز" دروستكراون، له‌ماوه‌كانى رابردودا له‌لایه‌ن شاره‌وانى كه‌لاره‌وه‌ تیروپشكیان بۆ كرا به‌مه‌به‌ستى پێدانى زه‌وی له‌به‌رامبه‌ر راده‌ستكردنه‌وه‌ى خانوه‌كانیان به‌ شاره‌وانى، به‌ڵام تائێستا هه‌ر ژماره‌ی زه‌وییان پێدراوه‌ و شوێنى زه‌ویه‌كانیان به‌ فیعلی راده‌ست نه‌كراوه‌ته‌وه‌.
 
له‌به‌رامبه‌ردا، سەرۆکی شارەوانی کەلار، ئەکرەم ساڵح، بە رادیۆی دەنگی وت: وەرگرتنی بڕە پارەکە لە بەرامبەر ئەنجامدانی کەشفە بۆ زەویەکانیان.
 
هاوکات رەتیکردەوە لە ماوەی مانگێکدا خانوەکانیان بڕوخێندرێت،
وه‌كخۆی وتى: "ئەو کاتەی بەتەواوی زەویەکانیان پێدرا و رێکارەکانیان تەواو بون، لەدوای مانگێک ده‌ڕوخێندرێن".
 
له‌باره‌ى ئه‌وه‌ى بۆچی زه‌ویه‌كانیان راده‌ست ناكرێت، سه‌رۆكى شاره‌وانى كه‌لار ئاماژه‌ى به‌وه‌كرد كه‌ زه‌وییان بۆ دیارییكراوه‌، به‌ڵام تەنها گرفت قەرەبونەکردنەوەی ژمارەیەک جوتیارە كه‌ كاریان له‌و زه‌وییانه‌دا كردوه‌.
 
 



Dengnet.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 1,663,828     ژمارەی میوان 730