دەنگ نێت
تاوەکو ئێستا لە پارێزگای سلێمانی و ئیدارەی گەرمیان موچەی ٢ مانگی مامۆستایانی وانەبێژ خەرج نەکراوە، نوێنەرێکی مامۆستایانی وانەبێژیش حاڵەتەکە بە جیاکاریی کردن ناودەبات.
مەجید محەمەد، نوێنەری مامۆستایانی وانەبێژ لە قەزای کەلار، بۆ رادیۆی دەنگ وتی: تائێستا موچەی مانگی (٧ و ٨) تەموز و ئابی ئەمساڵمان وەرنەگرتوە، بەنیوەش پارەکەمان پێدەدرێت.
وتیشی: ئەم جیاوازیە بۆ پارێزگای سلێمانی و ئیدارەی گەرمیانە کە هەمو مانگێک دوبارە دەبێتەوە.
باسی لەوەشکرد: موچەی ئێمە پاش موچەی خانەنشینان دابەشدەکرێت، بەڵام لە پارێزگای هەولێر و دهۆک لە کاتی خۆیدا موچەکانیان پێدەدەرێت.
رادیۆی دەنگ بۆ وەرگرتنی قسەی ئەوان لەسەر ئەم کێشەیە، پەیوەندی بە دارا ئەحمەد، بەڕێوبەری گشتی پەروەردەی گەرمیانەوە کرد، بەڵام پەیوەندیەکەی بێ وەڵام بو.