هه‌نگاوێكى وه‌زاره‌تى كاره‌با له‌گه‌رمیان نیگه‌رانى لێده‌كه‌وێته‌وه‌

2022/05/15 - 07:34 | 326 جار بینراوە    
 
ده‌نگ نێت
 
ئەمڕۆ وەزارەتی کارەبا بۆ ماوه‌ى 24 کاتژمێر كاره‌باى به‌رده‌وام ده‌دات به‌ پارێزگای سلێمانی وئیدارەی گەرمیان به‌مه‌به‌ستى تاقیكردنه‌وه‌، بەڵام سەرۆکی لیژنەی پیشەسازی و وزە لە ئه‌نجومه‌نى پارێزگای سلێمانی دەڵێت: كاته‌كه‌ى گونجاو نیه‌ بۆ ئه‌م تاقیكردنه‌وه‌یه‌.
 
وه‌زاره‌تى كاره‌با له‌ راگه‌یه‌نراوێكدا ئاشكراى كرد، له‌ ئه‌مڕۆوه‌ بۆ ماوه‌ى دو رۆژ، كاره‌با به‌ به‌رده‌وامى ده‌دات به‌ پارێزگا و ئیداره‌كان، به‌مه‌به‌ستى دیاریکردنی پشکی پێویستی کارەبا بۆیان.
 
له‌باره‌ى ئه‌م هه‌نگاوه‌وه‌، کەریم عه‌لی، سەرۆکی لیژنەی پیشەسازی و وزە لە ئه‌نجومه‌نى پارێزگای سلێمانی، بۆ رادیۆی ده‌نگ وتى: ئەنجامدانی ئەو تاقیکردنەوە لە ئێستادا بۆ پارێزگای سلێمانی و بەتایبەت تر بۆ گەرمیان، نەگونجاوە، چونکە ئەو رێژەیەی ئێستا دیاری دەکرێت کەمتره‌ لە چاو ئەو رێژەیەی لە مانگەکانی داهاتو لە گەرمیان هاوڵاتیان پێویستییانە.
 
هه‌ر له‌مباره‌یه‌وه‌ رادیۆی دەنگ پەیوەندی به‌ بەڕێوبەری گشتى کارەبای گەرمیان و وتەبێژی بەرێوبەرایەتی گشتی کارەبای گەرمیانەوە کرد، بەڵام پەیوەندیەکانیان بێ وەڵام بون.
 
کەریم عه‌لی، ئاماژه‌ى به‌وه‌كرد: ئێستا هاوڵاتیان ئامێرێکی کەم کار پێدەکەن، به‌پێچه‌وانه‌ى مانگه‌كانى داهاتو كه‌ كه‌شوهه‌وا گه‌رمتر ده‌بێت، ئه‌مه‌ش به‌وته‌ى خۆی ده‌ره‌نجامێكى ورد نادات به‌ده‌سته‌وه‌ و بۆ ئەوەی پشکی راستەقینەی ناوچه‌كه‌ له‌ به‌كارهێنانى كاره‌با بزانرێت.
 
 
 



Dengnet.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 717,799     ژمارەی میوان 34