دەنگ نێت
نزمی ڤۆلتییەی کارەبا مەترسی بێ ئاو بون لە کەلار دروست دەکات، بەڕێوبەری ئاوی کەلاریش دەڵێت: دابەزینی ڤۆڵتیە پەمپەکانی پاڵاوگەکەمان دەسوتێنێت.
سامان رەحیم، بەڕێوبەری ئاوی کەلار بۆ رادیۆی دەنگ وتی: بەهۆی ئەوەی ڤۆڵتیەی کارەبا نزمە، زۆرجار پەمپەکانی پاڵاوگەی ئاوی کەلار ناتوانرێت کاری پێبکرێت، کەپەیوەندیش بە کارەباوە ئەکەین، ئەڵێن لە دەسەڵاتی ئێمەدا نییە، بۆیە بەناچاری هەندێکجار ناتوانین ئاو دابەش بکەین.
وتیشی: لە هەندێک گەڕەک کە بیرە ئیرتوازییەکانمان کارەبای بەردەوامی هەیە، بەتایبەت ئەو بیرانەی نزیکن لە کەلاری کۆنەوە، هەندێکجار ڤۆڵتیەی کارەبان نزمە و ناتوانین کار بە بیرە ئیر توازییەکە بکرێت.
باسی لەوەشکرد: هەندێکجار دەیخەینە کار بەس بۆ ئەوەی خەڵکی بێ ئاو نەبێت، بەڵام ئەمە بۆ خۆی مەترسییە لەسەر پەمپەکان.
لە کەلار پاڵاوگەیەکی ئاو هەیە بۆ پێدانی ئاو بە ماڵان و ۱۰ پەمپی تێدایە کە نرخی هەر پەمپێک نزیکەی ۱٦۰ ملیۆن دینارە.
کێشەی دابەزینی ڤۆڵتییە پێشتر لە قەزای کەلار بونی نەبو، بەڵام لە سەرەتای مانگی حوزەیرانەوە و لەوکاتەی کارەبای نیشتمانی لە ئیدارەی گەرمیانەوە و لەسەر هێڵی کارەبای نیشتیمانی گەیەنرایە پارێزگای دیالە، ڤۆڵتیەی کارەبای سنوری گەرمیان رۆژ لە دوای رۆژ خراپتر بێت.
پێشتریش چالاکوانان هۆشدارییان لەم کێشەیە دابو و رایانگەیاندبو کە ئەم پرۆژەیە زیانی زۆری بۆ سنورەکە بەجێهێشتوە.
کلیک بکە بۆ خوێندنەوەی راپۆرتێکی پێشتری رادیۆی دەنگ لەسەر فرۆشتنی کارەبا بە عێراق لە رێگەی گەرمیانەوە.