دامەزراندنی ژمارەیەک فەرمانبەر لە باوەنور نیگەرانیی لێدەکەوێتەوە

2024/06/05 - 09:34 | 135 جار بینراوە    
 
دەنگ نێت
 
دوای ئەوەی حکومەتی هەرێم دامەزراندنی ژمارەیەک فەرمانبەری بۆ فەرمانگەی کارتی نیشتمانی ناحیەی باوەنورـی سەر بە کەلار راگەیاند، ناڕەزایەتی دروستبوە و ژمارەیەک گەنج باس لەوەدەکەن ئەوان کە دانیشتوی ناحیەکەن دانەمەزرێنراون و خەڵکی دیکە دامەزرێنراوە.
 
محەمەد سەعید، دەرچوی زانکۆ لە باوەنور، یەکێکە لەو کەسانەی فۆرمی دامەزراندنی بۆ فەرمانگەی کارتی نیشتمانی ناحیەکەیان پڕکردوەتەوە و ناوی بۆ دامەزراندن نەگەڕاوەتەوە، بۆ رادیۆی دەنگ وتی: لە دامەزراندنەکەدا باوەنورییەکان دانەنراون، کەچی خەڵکی کەلار و دەربەندیخان و رزگاری و ناوچەکانی تر دانراون.
 
وتیشی: زۆرێک لەو ناوانەی هاتونەتەوە نە نفوسیان باوەنورە، نە لەباوەنور دانیشتون، نە هیچ کەسێک لە باوەنور دەیانناسێت بە باوک و باپیریانەوە.
 
شێوازی دامەزراندنەکە بەشێوەیەک بوە کە هەر کەسێک خوازیار بوە، لە رێگەی لینکێکی ئەلیکترۆنییەوە ناوی خۆی تۆمارکردوە.
 
محەمەد، رەخنەی لەو شێوازە هەیە و بەوتەی خۆی هەرکەسێک کە خوێنەواریشی نەبوایە دەیتوانی ئەو فۆرمە پڕبکاتەوە و هەر زانیارییەک کە بیەوێت بنوسێت، وتیشی: هیچ لیژنەیەکمان نەبینیوە تەنها ئەوەی فۆڕمێکمان بەلینک پڕکردوەتەوە.
 
لەبارەی ئەوەی ئایا لیستەکە هیچ دەرچویەکی زانکۆی سنوری ناحیەکەی تێدانییە، محەمەد وتی: لەو ناوانەی کە هاتونەتەوە یەک کەسیان خەڵکی باوەنورن، ئەویش خۆی دەرچوی بەشی کارەبایە و بۆ بەشی ئایتی ناوی هاتوەتەوە.



Dengnet.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 1,818,807     ژمارەی میوان 1782