پێوستمان بە هۆشیارییە، نەک کۆمەک

2024/05/30 - 12:09 | 138 جار بینراوە    
 
سەردەشت محەمەد
 
بەپێی ئەو ئامار و داتایانەی خراونەتەڕو تەنها لە ماوەی 10 ساڵدا رێژەی توشبون بە نەخۆشی شێرپەنجە لە پارێزگای سلێمانی، لە 1000 کەس لە ساڵێکدا بەرزبوەتەوە بۆ 3000 هەزار توشبو.
 
ئەمە تەنها ئامار و داتای ئەو کەسانەن کە لە نەخۆشخانەکانی سلێمانیدا تۆمارکراون، رەنگە زیادەڕۆی نەکەین ئەگەر بڵێین نزیکەی  ئەو ژمارەیەش رویان لە شوێنانی دیکە کردوە بۆ چارەسەر و ناویان تۆمار نەکراوە.
 
ئەمە زەنگێکی مەترسیدارە و ئەگەر  لە هەر وڵاتێکی دنیادا، لەو وڵاتانەی کە قەدر و بەهای مرۆڤ لە پێش هەمو پلە و پۆست و بەرپرسیاریەتییەکەوەیە، ئامارێکی لەم جۆرە بخرایەتەڕو، ئەوا گۆڕانکاری گەورە لە لە هەیکەلی حکومڕانی ئەو ڵاتەدا و بەتایبەت لە کەرتی تەندروستییەکەیدا دەکرا، کەچی لای ئێمە نەک کەس خۆی لەپرسێکی وەها تێناگەیەنێت، بەڵکو دەسەڵاتی سنورەکە لەبری گۆڕانکاری لە هەیکەلی ئیدارەی شار و هەرێمەکەدا دێت گۆڕانکاری لە ژینگە س سروشتی شاردا دەکات و لەبری زیادکردنی رێژەی سەوزایی و  دەستخستنەسەر هۆکارەکانی پیسبونی ژینگە و  دۆزینەوەی چارەسەری گونجاو بۆیان، دێت هەرچی ژینگەی سروشتی هەیە دەداتە بەر نوکی شۆفڵ و دەیکات بە ئاپارتمان و باڵەخانەی دەیان نهۆمی.
 
شار پڕدەکەن لە ژەهر و گەروی مرۆڤەکان پڕدەکەن لە گازی ژەهراوی تا ئەو ئەندازەیەی کە توشی نەخۆشی شێرپەنجەیان دەکەن و دواتریش لەڕێگەی دانانی سندوقی خێرخوازییەوە کۆمەک بۆ کڕینی دەرمان و پێداویستی نەخۆشخانەکانی شێرپەنجە کۆدەکەنەوە.
 
ئامار و داکان پێماندەڵێت داهاتومان ئەوەندە سەخت و پڕمەترسییە کە مرۆڤ ناوێرێت لە ئێستاشەوە بیری لێبکاتەوە، بۆ رێگریکردن لەم مەترسییەش، تاکە چارەسەر هۆشیاربونەوەمانە، هۆشیارییەک کە رێگربێت لەوەی نەێڵێت هیچ کەس و لایەن و گروپێکی بەرژەوەندیخواز نەک نە ژینگەی شار و وڵاتێک بۆ بەرژەوەندی خۆی تەختبکات، بەڵکو شەرم بکات دەست ببات بۆ بڕینەوەی دارێک.
 

 




Dengnet.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 1,818,723     ژمارەی میوان 1698