پۆلیسی گەرمیان: ئەو شۆفێرەی تۆمەتبار بو لە روداوەکەی رێگای کەلار- کفری هێشتا لەژێر لێکۆڵینەوەدایە

2024/05/26 - 12:42 | 262 جار بینراوە    
 
دەنگ نێت
 
زیاتر لە ۱۰ رۆژە ئەو شۆفێرەی کە تۆمەتبارە بە رودانی روداوە هاتوچۆکەی رێگەی کەلار- کفری دەستگیر کراوە، وتەبێژی پۆلیسی گەرمیانیش دەڵێت: لێکۆڵینەوە لەگەڵی بەردەوامە.
 
رۆژی ۱٤ـی ٥ـی ۲۰۲٤ له‌ رێگه‌ى كه‌لار- كفری، مینی پاسێك كه‌ ژماره‌یه‌ك خوێندكارى ئاماده‌یی باكورى له‌ كه‌لار ده‌گواسته‌وه‌ کفری بۆ ئەنجامدانی گه‌شتێكى زانستى، له‌ نزیك گوندی حه‌سیره‌ وه‌رگه‌ڕا، به‌وهۆیه‌وه‌ ٤ كچه‌ خوێندكار گیانیان له‌ده‌ستدا و ٥ كچه‌ خوێندكارى تر و مامۆستایه‌ك و شۆفێری مینی پاسه‌كه‌ش بریندار بون.
 
هەر رۆژێک پاش ئەو روداوەکە، سامان عه‌لی- وته‌بێژی به‌ڕێوبه‌رایه‌تى هاتوچۆی گه‌رمیان، تایبه‌ت به‌ رادیۆی ده‌نگى وت: ئه‌و ئۆتۆمبیله‌ى كه‌ تۆمه‌تباره‌ به‌وه‌ى ده‌ستى شكاندوه‌ته‌ سه‌ر ئه‌و مینی پاسه‌ى كه‌ به‌ ژماره‌یه‌ك خوێندكاره‌وه‌ له‌ رێگاى كه‌لار- كفری وه‌رگه‌ڕا، ده‌ستی به‌سه‌ردا گیراوه‌ و شۆفێره‌كه‌یشی گیراوه‌.
 
ئه‌وكات وا بڵاوكرایه‌وه‌ كه‌ مینی پاسه‌كه‌ له‌لایه‌ن ئۆتۆمبیلێكه‌وه‌ ده‌ستى به‌سه‌ردا شكێنراوه‌ته‌وه‌ و شۆفێری مینی پاسه‌كه‌ش كۆنترۆڵی له‌ده‌ستداوه‌ و ئۆتۆمبیله‌كه‌یان 
وه‌رگه‌ڕاوه‌.
 
دوای زیاتر لە ۱۰ رۆژ لە دەستبەسەرداگرتنی ئەو شۆفێرە، وتەبێژی پۆلیسی گەرمیان دەڵێت: لێکۆڵینەوە لەگەڵیدا بەردەوامە.
 
عەلی جەمال قەدوری، وتەبێژی پۆلیسی گەرمیان، بۆ رادیۆی دەنگ وتی: سەیری کامێراکان دەکەین و لێکۆڵینەوەی وردیش لە تۆمەتبارەکە بەردەوامە.



Dengnet.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 1,818,639     ژمارەی میوان 1614