کۆمپانیای بێشکان: بەمشێوەیە بێت ٥ ساڵی تر پرۆژەی رێگای کەلار- سلێمانی تەواو دەبێت

2023/05/31 - 08:54 | 246 جار بینراوە    
 
دەنگ نێت
 
بەڕێوبەری پرۆژەی رێگای کەلارـ سلێمانی دەڵێت: لەئێستادا کارکردن لە پرۆژەکە رانەگیراوە و دەستبەکاربوەتەوە و هەفتانە ۲٥۰ ملیۆن دیناری بۆ تەرخان دەکرێت.
 
رابەر سەعید عوسمان، ئەندازیار و بەڕێوبەری پرۆژەی رێگای کەلارـ سلێمانی، بە رادیۆی دەنگی راگەیاند: لەئێستادا کارکردن لە پرۆژەکە دەستیپێکردوەتەوە، بەڵام بەپێی ئەو بودجەیەی بۆی تەرخان کراوە کاری تێدا دەکرێت.
 
وتیشی: هەفتانە ۲٥۰ ملیۆن دیناری بۆ تەرخان دەکرێت.
 
لەسەدا ٥٨ـی پرۆژەکە تەواو بوە و ٦۰ ملیاری پێویستە بۆ تەواوکردنی ئەو بەشانەی دیکەی کە ماون، بەوتەی ئەو ئەندازیارە: ئەگەر مانگانە ٥ ملیاریشی بۆ تەرخان بکرێت، هێشتا ساڵێکی پێویستە بۆ تەواوکردنی.
 
باسی لەوەشکرد: تەواوکردنی ئەم پرۆژەیە کەوتوەسەر ئەوەی چەندێک زیاتر گوژمەی بۆ دابین بکەن، تاگوژمەکە زیاتر بێت زوتر پرۆژەکە تەواو دەبێت.
 
لەبارەی ئەوەی تەرخانکردنی ۲٥۰ ملیۆن دیناری هەفتانە بە ماوەی چەندێک پرۆژەکە تەواو دەکات، رابەر سەعید وتی: ئەگەر هەمو هەفتەیەک ئەم بڕە پارەیە لەکاتی خۆیشی بدرێت، هێشتا ٥ ساڵی دیکەی دەوێت بۆ تەواوبونی پرۆژەکە.
 



Dengnet.net - 2023
دروستکراوە لەلایەن کۆمپانیای (کۆدتێك)ەوە
ژمارەی سەردان 1,371,271     ژمارەی میوان 38