پێنج هەزار خێزانی ئەنفال بێبەش دەکرێن لە کارتی نیشتمانی

2023/05/25 - 08:21 | 445 جار بینراوە    
 
دەنگ نێت
 
چالاکوانێکی ئەنفال رایدەگەیەنێت رێگریی و بەربەستێکی گەورە لەبەردەم ٥ هەزار خێزانی ئەنفال دروستکراوە بۆ وەرگرتنی کارتی نیشتمانی، داواش لە بەرپرس و نوێنەران دەکات بەدەم چارەسەری کێشەکەوە بێن.
 
سەیوان خورشید، بە رادیۆی دەنگی راگەیاند: بۆ دەرکردنی کارتی نیشتیمانی، حکومەتی عێراقی دان نانێت بەو ناوانەی لە فایلی (پێنج-ئەلیف)دان کە هی ئەوانەن نفوسیان قادرکەرەم چەمچەماڵە.
 
رونیشیکردەوە: بەشێکی زۆری خێزانی ئەنفالکراوان لەم فایلەدا تۆمارن، ئێستا بۆ وەرگرتنی کارتە نیشتمانییەکەیان حکومەتی عێراقی مەرجی داناوە بەوەی دەبێت هەمو ئەو خێزانانە سەلماندنی بنەچە (اثبات النسب) بکەن، بۆ ئەمەش دەبێت بچنە دادگا و لەوێ ئەو کارە بکەن، کە کات و تێچویەکی زۆری دەوێت.
 
ئەو چالاکوانەی ئەنفال وتیشی: بەپێی ئەم رێکارە بێت، هیچ نەوەیەکی ئەنفالکراو کارتی نیشتیمانی بۆ دەرناکرێت.
 
هەربۆیە داوای لە بەرپرسان و نوێنەرانی کورد کرد لە بەغدا، بەدەم کێشەکەوە بێن و چارەسەرێکی بۆ بدۆزنەوە.



Dengnet.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 1,818,757     ژمارەی میوان 1732