دەنگ نێت
لە قوتابخانەیەکی کەلار فێرخوازان پارەیان لێوەرگیراوە بۆ چاککردنی کەرەستەکانیان، بەڕێوبەرەکەیشی دەڵێت: فێرخوازەکان خۆیان پارەیان کۆکردوەتەوە، هاوکات هەر بە فێرخوازانیش قوتابخانەکە پاکدەکرێتەوە.
م. گەرمیان عەلی، بەڕێوبەری خوێندنگای ئیبراهیم ئەحمەد لە گەڕەکی گۆران لە کەلار، بۆ رادیۆی دەنگی وت: بەشێکی فێرخوازەکان لەسەر ویستی خۆیان بڕی ٧٥٠ تاوەکو ١٥٠٠ دیناریان کۆکردوەتەوە و داوایان کردوە خۆیان گۆڕانکاری لە پۆلەکانیان بکەن.
رەتیشیکردەوە بە داوای ئەوان و ناچاری پارە لە فێرخوازان وەرگیرابێت.
هاوکات بەپێی زانیاریەکان ژمارەیەک فێرخوازی قوتابخانەکە ئاگادارکراونەتەوە کە پێش دەستپێکی دەوام بۆ هەر رۆژێک ٢ کەسیان پۆلەکانیان پاک بکەنەوە.
م. گەرمیان عەلی، ئەم گرفتەی بەستەوە بە نەبونی کارگوزار لە خوێندنگاکەیان و وتی: بەپێی لیژنەیەک ئەوەمان دیاریکردوە کە هەر رۆژێک ٢ فێرخواز ١٠ خولەک پێش دەستپێکی دەوامکردن پۆلەکانیان پاک بکەنەوە.