زۆربەی فەرمانگەکانی گەرمیان پابەندی درێژکردنەوەی کاتی دەوام نەبون

2022/10/05 - 07:11 | 165 جار بینراوە    
 
دەنگ نێت
 
تائێستا بەشی رەهای فەرمانگەکانی گەرمیان پابەند نەبون بە درێژکردنەوەی کاتی دەوامی رۆژانەیان بۆ کاتژمێر 3ـی پاش نیوەڕۆ، ئەمەش ‌دوای زیاتر له‌ ٣ مانگ لە ئاراستەکردنی نوسراوێک لە‌ ئیداره‌ى گه‌رمیانەوە بۆ فەرمانگەکان بۆ ئەو مەبەستە.
 
به‌پێى زانیارییه‌كانى رادیۆى ده‌نگ، بۆ ماوه‌ى زیاتر له‌ 3 مانگه‌ ئیداره‌ى گه‌رمیان نوسراوێکی وه‌زاره‌تى ناوخۆی لەبارەی ده‌وامى فه‌رمانگه‌ حكومیه‌كانەوە ناردوە بۆ فەرمانگەکانی سنورەکە کە تیایدا ئاماژە بەوەدراوە دەوام درێژبكرێته‌وه‌ بۆ كاتژمێر 3ـی دواى نیوه‌ڕۆ.
 
به‌پێى ئه‌و زانیارییانه‌ى كه‌ رادیۆی دەنگ لە چەند فه‌رمانگه‌یەکی حكومیەوە وه‌ریگرتوه‌، تائێستا زۆرینەی رەهای فەرمانگەکان پابەند نەبون بەو بڕیارە و دەوامی رۆژانە لەکاتژمێر 1 یان 1:30 خولەک و به‌شێكى تريشیان له‌كاتژمێر 2:00 تەواو دەبێت.
 
بەشێک لەفەرمانبەران رایانگەیاندوە: هه‌ر كات شایسته‌ داراییه‌كانمان بۆ دابین كراوه‌ و پله‌ به‌رزكردنه‌وه‌كانمان بۆ كرا، ئه‌و كات ئێمه‌ش ده‌وام دەكه‌ین تا ئه‌و كاته‌ى بۆمان دیاریكراوه‌.
 
ئه‌مه‌ش له‌ كاتێكدایه‌ له‌ ماوه‌كانى رابردودا بەرپرسی راگەیاندنی ئیدارەی گەرمیان له‌مباره‌یه‌وه‌ به‌ رادیۆى ده‌نگى راگه‌یاندبو: لیژنه‌یه‌كى تایبه‌تمه‌ندیان هه‌یه‌ كه‌ سه‌ردانى فه‌رمانگه‌كان ده‌كات به‌مه‌به‌ستى به‌دواداچون بۆ شێوازى ده‌وامكردن و كاره‌كانیان، هه‌ر فه‌رمانگه‌یه‌ك به‌و كاته‌ى بۆى دیارى كراوه‌ پابه‌ند نه‌بێت ئیجرائاتى له‌گه‌ڵدا ده‌كرێت.
 
هه‌ر به‌پێى زانیارییه‌كانى رادیۆى ده‌نگ، تاوه‌كو ئێستا هیچ فه‌رمانگه‌یه‌ك به‌هۆى پرسی درێژکردنەوەی کاتی دەوامی رۆژانەوە لێپێچینەوەی لەگەڵ نەکراوە.
 



Dengnet.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 924,568     ژمارەی میوان 22