سه‌رجه‌م به‌رپرسانى پۆسته‌كانى زانكۆی گه‌رمیان ده‌گۆڕێن

2022/09/22 - 08:38 | 329 جار بینراوە    
 
ده‌نگ نێت
 
بڕیاره‌ سه‌رجه‌م به‌رپرسانى پۆسته‌كانى ناو زانكۆی گه‌رمیان جگه‌ له‌ سه‌رۆكى زانكۆكه‌ بگۆڕێن، سەرۆکی زانکۆكه‌ش ده‌ڵێت: پۆستەکان رەوانەی وەزارەتی خوێندنی باڵا کراون.
 
لە ماوەی پێشوتردا دەستەی گەرمیان لە راگەیاندراوێکدا باسی لەوە کرد ته‌نها ژماره‌یه‌ك له‌ پۆسته‌كانى زانكۆى گه‌رمیان ده‌گۆڕێن نه‌ك هه‌موى، جه‌ختیشی كرده‌وه‌ دەبێت بەبێ جیاوازی سەرجەم پۆستەکانى زانكۆكه‌ بگۆڕدرێن کە بە پێچەوانەی رێنماییەکانەوە دانراون.
 
له‌وباره‌یه‌وه‌، سەرۆكی زانکۆی گەرمیان، د. فەرهاد قادر، بە دەنگی وت: ئەو دەنگۆیە دورە لە راستیەوە کە بەشێک لە پۆستەکان نەنێردرابێتە وەزارەتی خوێندنی باڵا، بەڵکو سەرجەم پۆستەکان کە لە راگر و پلە تایبەتەکان بەرەو سەرەوەن و ١١ پۆستن نێردراون.
 
لە بارەی هەبونی پێوەرێکی دیاریکراو بۆ ئەو گۆڕانکاریانە، وتی: گۆڕانکاریەکان بە هه‌مان پێوەری وەزارەتی خوێندنی باڵا دەکرێت کە تایبەتمەندن بەو بابەتە و بە مەرج دانراون.
 
لە بارەی کاتی گۆڕانکاریەکانیشەوە، ئەوەی خستەڕو: لە ماوەیەکی نزیکدا لیژنه‌ پێکدێت و چاوپێکەوتن لەگەڵ کاندیدەکان ئەنجام دەدرێت.
 
گۆڕانکاری لە پۆستەکان بە دو قۆناغ دەکرێت و ئەوانە دەگرێتەوە کە ماوەی یاساییان كه‌ ٤ ساڵە تەواو کردوە و له‌گه‌ڵ ئه‌وانه‌ى بەوەکالەتن.
 
 



Dengnet.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 847,173     ژمارەی میوان 42