پۆلیسی گەرمیان لەبارەی لابردنی بازگەیەکیانەوە لەلایەن هێزی کۆماندۆوە رونکردنەوە دەدات

2022/09/13 - 02:07 | 1029 جار بینراوە    
 
دەنگ نێت
 
بازگەیەکی پۆلیسی گەرمیان لە سێ ریانی سەوزبڵاخ لادەبرێت، لەبارەی دەنگۆی لادانی بازگەکەشەوە لەلایەن هێزی کۆماندۆوە، وتەبێژی پۆلیسی گەرمیان رونکردنەوە دەدات.
 
بازگەیەکی حکومەتی هەرێم لە سێ ریانی گوندی سەوزبڵاخ لە ناحیەی قۆرەتو لە گەرمیان، دوای ئەوە ماوەیەک ئاسایش و پاشان مەفرەزەی هاتوچۆی تێدابو، دواتر پۆلیسی ناوخۆی تێدا جێگیر کرا، چەند هەفتەیەکیشە بازگەکە بە تەواوی هەڵگیراوە و باس لەوە دەکرێت ئەو هێزەی کۆماندۆ کە لە دەروازەی پەروێزخان جێگیرکراوە، بازگەکەی لاداوە.
 
لایخۆشیەوە عەلی جەمال قەدوری، وتەبێژی پۆلیسی گەرمیان، بۆ رادیۆی دەنگ وتی: کۆتایی مانگی ئایاری ئەمساڵ کە وەزارەتی ناوخۆ بڕیاریدا بە دروستکردنی ژورێکی ئۆپراسیۆن بۆ دەستگیرکردنی ئەو کەسانەی کە فەرمانی دەستگیرکردنیان هەیە و نەگیراون، بازگەیەکمان بەشێوەیەکی کاتی لە سێ ریانی سەوزبڵاخ دانا، ماوەی نزیکەی مانگێکیشە بەبڕیاری سەروی خۆمان لامانبردوە.
 
لەبارەی ئەو دەنگۆیانەی باس لەوەدەکەن بازگەکە لەلایەن هێزێکی کۆماندۆوە لابراوە، وتەبێژی پۆلیسی گەرمیان وتی: هیچ پەیوەندیەکی بەهێزی کۆماندۆوە نیە، ئەم بازگەیە و ئەو هێزە دو ئیشی زۆر جیاوازیان هەیە.
 
هاوکات باس لەوە دەکرێت لەو بازگەیەدا پارە لە شۆفێران وەرگیراوە و هەربۆیە هێزەکەی کۆماندۆ بازگەکەی لاداوە، بەڵام وتەبێژی پۆلیسی گەرمیان ئەو زانیارییانەی رەد کردەوە و وتی: هیچ هێزێک نزیک ئەم بازگە نەکەوتوەتەوە.



Dengnet.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 836,886     ژمارەی میوان 42