ڤیدیۆیەکی نوێی هێرشەکەی کەلار بڵاودەبێتەوە

2022/06/20 - 02:42 | 1121 جار بینراوە    
 
دەنگ نێت
 
لەنێو بێدەنگیی هێزە ئەمنیەکان، ڤیدیۆیەک بڵاو دەبێتەوە کە وەک دەوترێت هی ئەو ئۆتۆمبیلەیە کە لە کەلار بە درۆن لێیدرا، تیایدا دەردەکەوێت ئۆتۆمبیلەکە بە تەواوی نەسوتاوە.
 
ئەمڕۆ ڤیدیۆیەک لە تۆڕە کۆمەڵایەتییەکان بڵاو بوەتەوە و تیایدا ئۆتۆمبیلێکی جیپ لاریدۆی رەنگ سپی دەردەکەوێت کە لایەکی سوتاوە و وەک باس دەکرێت ئەو ئۆتۆمبیلەیە کە لە کەلار رۆژی هەینی لەلایەن درۆنی تورکییەوە کرایە ئامانج و تیایدا ٤ کەس گیانیان لەدەستدا و کەسێکی تریش بریندار بو. لە ڤیدیۆکەدا دەردەکەوێت ئۆتۆمبیلەکە بە تەواوی نەسوتاوە، بەڵکو تەنها لایەکی بەرکەوتوە.
 
ئەم ڤیدیۆیە لەکاتێکدایە کە رۆژی هێرشەکە کە رێگە بە کەناڵەکانی راگەیاندن درا بە وێنەگرتنی ئۆتۆمبیلەکە، ئۆتۆمبیلەکە بە تەواوی سوتا بو و تەنها لاشەکەی مابوەوە، ئەمەش گومانی زۆری دروست کردوە.
 
لەم نێوەندەشدا هێزە ئەمنیەکان و بەرپرسانی ئیداری سنورەکە تائێستا هیچ رونکردنەوەیەکیان لەبارەی روداوەکە نەخستوەتەڕو و ئاماژەیان بە هیچ وردەکارییەکی نەداوە.



Dengnet.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 717,933     ژمارەی میوان 22