ئه‌مریكا هۆشداریی ده‌دات و داواى گفتوگۆی به‌غدا و هه‌ولێر و یه‌كده‌نگی كورد ده‌كات

2022/04/23 - 01:01 | 277 جار بینراوە    
 
ده‌نگ نێت
 
ویلایه‌ته‌ یه‌كگرتوه‌كانى ئه‌مریكا جه‌خت له‌وه‌ ده‌كاته‌وه‌ ده‌بێت به‌ زوترین كات لایه‌نه‌كان رێكبكه‌ون و كابینه‌ى نوێی حكومه‌تى عێراقی پێكبێت، ئه‌مه‌ش له‌ كۆنفرانسێكى جێگری یاریدەدەری وەزیری دەرەوەی ئەمەریکا بۆ کاروباری عێراق و ئێران جه‌ختی لێكرایه‌وه‌.
 
جینیفەر گاڤیتۆ، له‌و كۆنفرانسه‌كه‌دا كه‌ له‌ رێگه‌ى په‌یوه‌ندی ته‌له‌فۆنیه‌وه‌ ئه‌نجام درا و رادیۆی ده‌نگ ئاماده‌ى بو، جه‌ختى له‌وه‌كرده‌وه‌ پشتیوانى زو پێكهێنانى حكومه‌تى نوێی عێراقی ده‌كه‌ن، هۆشداریشی دا له‌وه‌ى: پێكنه‌هێنانى حكومه‌ت، كاریگه‌ریی ده‌كاته‌ سه‌ر سه‌قامگیریی و ئاسایشی وڵاته‌كه‌، هه‌روه‌ها ئامانجى سه‌ره‌كی هه‌ڵبژاردنیش شكست پێدێنێت.
 
له‌ته‌وه‌رێكى دیكه‌دا و له‌باره‌ى ناكۆكیه‌كانى حكومه‌تى ناوه‌ند و هه‌رێمى كوردستان به‌تایبه‌ت له‌ بوارى وزه‌، گاڤیتۆ ئاماژه‌ى به‌وه‌كرد: له‌ كۆبونه‌وه‌كانیان دا له‌گه‌ڵ هه‌ردولا جه‌ختیان له‌وه‌كردوه‌ته‌وه‌ كه‌ پێویسته‌ هه‌ردولا گفتوگۆ بكه‌ن و میكانیزێك بۆ رێككه‌وتن له‌باره‌ى كێشه‌كانیانه‌وه‌ بدۆزنه‌وه‌.
 
له‌ ئاماژه‌یه‌كیشدا بۆ په‌رتبونى ده‌نگى كورد له‌ ناوه‌ند، باسی له‌وه‌كرد: ئێمه‌ پشتگیری یه‌ك ده‌نگی كورد ده‌كه‌ین.
 
پرسی مافه‌كانى مرۆڤ و ئازادی رۆژنامه‌وانى، یه‌كێكى دیكه‌ بو له‌و ته‌وه‌رانه‌ى كه‌ جێگری یاریده‌ده‌رى وه‌زیری ده‌ره‌وه‌ى ئه‌مریكا قسه‌ى له‌باره‌وه‌كرد و زۆرێك له‌ رۆژنامه‌نوس و ده‌زگاكان له‌باره‌یه‌وه‌ پرسیاریان كردبو، له‌باره‌یه‌وه‌ ئاماژه‌ى به‌وه‌كرد: له‌ گفتوگۆكانماندا له‌گه‌ڵ به‌رپرسانى عێراق و هه‌رێمی كوردستانیش جه‌ختمان له‌ گرنگى ئازادی بیروڕا كرده‌وه‌ و به‌یه‌كێك له‌ پایه‌ گرنگه‌كانى عێراقی ده‌زانین.
 
 
 



Dengnet.net - 2022
دروستکراوە لەلایەن کۆمپانیای (کۆدتێك)ەوە
ژمارەی سەردان 836,638     ژمارەی میوان 27