هیچ كۆمپانیایه‌ك ئاماده‌ نیه‌ پرۆژه‌ى پاڵاوگه‌ى ئاوی كفری وه‌ربگرێت

2022/03/14 - 12:34 | 387 جار بینراوە    
 
ده‌نگ نێت
 
وته‌بێژى ئاوى ده‌وروبه‌رى گه‌رمیان ده‌ڵێت: به‌هۆى كه‌مى بودجه‌كه‌یه‌وه‌ بۆ جارى ده‌وه‌م پرۆژه‌ى پاڵاوگه‌ى ئاوى قه‌زاى كفرى له‌لایه‌ن به‌ڵێنده‌ره‌كانه‌وه‌ وه‌رناگیرێت.
 
سالار عه‌زیز، وته‌بێژى به‌ڕێوبه‌رایه‌تى ئاوى ده‌وروبه‌رى گه‌رمیان، له‌مباره‌یه‌وه‌ بۆ رادیۆى ده‌نگ وتى: "به‌هۆى كه‌مى ئه‌و بودجه‌یه‌ى كه‌ بۆ پاڵاوگه‌ى ئاوى خواردنه‌وه‌ى قه‌زاى كفرى دانراوه‌، به‌ڵێنده‌ر وه‌رى ناگرێت، بۆ جارى دوه‌مه‌ ده‌خرێته‌ ته‌نده‌رینه‌وه و كه‌س ئاماده‌ نیه‌ پرۆژه‌كه‌ وه‌ربگرێت‌".
 
وتیشى: به‌ دروستكردنى ئه‌و پاڵاوگه‌یه‌ ده‌توانین سود له‌ سه‌رچاوه‌ى ئاوى باوه‌شاسوار وه‌ربگرین و بۆ ئاوى خواردنه‌وه‌ سودی لێوه‌ربگرین، ئه‌مه‌ش گرفتى ئاوى خواردنه‌وه‌ى قه‌زاكه‌ چاره‌سه‌ر ده‌كات.
 
سه‌رچاوه‌ى ئاوى خواردنه‌وه‌ى قه‌زاى كفرى له‌ قه‌زاى دوزخورماته‌وه‌ دابین ده‌كرا، به‌ڵام له‌ دواى روداوه‌كانى 16ـى ئۆكتۆبه‌ره‌وه‌، ناتوانرێت سود له‌و سه‌رچاوه‌ ئاوییه‌ وه‌ربگیرێت، ئه‌مه‌ش وایكردوه‌ ئه‌و قه‌زایه‌ روبه‌ڕوى كێشه‌ى ئاو ببێته‌وه‌، به‌تایبه‌تى كه‌ پشت به‌ بیری ئیرتیوازی ده‌به‌سترێت و ئاوی بیرى سنوره‌كه‌ش هه‌م خوێ و ماده‌ى دیكه‌ى زۆره‌، هه‌رمیش به‌كاریگه‌ریی وشكه‌ساڵی كه‌مبوه‌ته‌وه‌.
 
 



Dengnet.net - 2024
دروستکراوە لەلایەن کۆمپانیای (کۆدتێك)ەوە
ژمارەی سەردان 1,663,677     ژمارەی میوان 670